မိန်းမတစ်ယောက်ဟာ သူ့ ဂုဏ်ပုဒ်၊ သူ့စွမ်းဆောင်ချက်၊ သူ့ အတတ်ပညာနဲ့သူရပ်တည်လာခဲ့ ပေမယ့် အိမ်ထောင်ပြုတဲ့အခါ ယောက်ျားဖြစ်သူရဲ့ အရိပ်လွှမ်းမိုးမှု ကို အနည်းနဲ့အများ ခံစားရပါတယ်။ ဒါကြောင့် နာမည် ကျော်ကြားထင် ရှားတဲ့ မိန်းမတစ်ယောက်ရဲ့ ရင်တွင်း စကားကိုတူး ဖော်ကြည့် မိလိုက်ပါတယ်။
ပါရမီဖြည့်ဘက်ဆိုတာ ရှင်ဖုန်းနားလည်ထားတာ တစ်ယောက်နဲ့တစ်ယောက်လိုအပ်တာတွေကို ဖြည့်ဆည်းပေးတာလို့ထင်တယ်။ ဒါပေမဲ့ ယောက်ျားနဲ့ မိန်းမဘယ်သူ ကပို အရေးပါတယ်ဆိုတာတော့ တစ်ဖက်သတ်ကြီးမပြောချင်ဘူး။ တစ်ယောက်နဲ့တစ်ယောက် အပေး အယူမျှမျှ တတရှိဖို့က ပိုအရေးကြီးတယ်။ ပုခက်လွှဲတဲ့လက်က ကမ္ဘာ ကိုအုပ်စိုးတယ်ဆိုတဲ့စကားရှိပေမယ့် မိန်းမသားဆိုတာဘာပဲဖြစ်ဖြစ် ယောက်ျားနဲ့ယှဉ် ရင်အားနွဲ့တဲ့ သူပါ။ ရှင်ဖုန်း တစ်ယောက်တည်း ရဲ့အမြင်ပါ။
ရှင်ဖုန်း
အိမ်ထောင်တစ်ခုကို တိုင်းပြည် တစ်ခုနဲ့သာတင်စားမယ်ဆိုရင်တော့ ရှင်ဖုန်းက အဲဒီတိုင်းပြည်မှာ ဘုရင်မ မဖြစ်ချင်ဘူး။ ကိုယ့်ခင်ပွန်းကို ဘေးကနေ အကောင်းဆုံးပံ့ပိုးပေး နိုင်တဲ့သူပဲဖြစ်ချင်ပါတယ်။ ရှင်ဖုန်း တို့နှစ်ယောက်စလုံးမှာ သဘော ထားချင်း မတိုက်ဆိုင်တာတွေ အများကြီးရှိပါတယ်။ ကိုဥက္ကာနဲ့ ရှင်ဖုန်းက အသက်အရွယ်ကလည်းကွာတာကိုး။ အယူအဆတွေ၊ တွေးပုံတွေမတူဘူး။ ဒါပေမဲ့ ရှင်ဖုန်း တို့နှစ်ယောက်ကြားမှာ ကြီးကြီးမားမား ညှိစရာပြဿနာ သိပ်မရှိပါဘူး။ အသေးအမွှား ကိစ္စတွေပဲရှိပါတယ်။ အဲဒီတော့ အဆင်ပြေပါတယ်။
လုပ်ငန်းခွင်ထဲက အိမ်ရှင်မတွေကို ရှင်ဖုန်း အရမ်းချီးကျူးသလို၊ အရမ်းလည်း အားကျပါတယ်။ အိမ်ထောင် တစ်ခုထူထောင်ပြီးပြီ ဆိုရင်တော့ တစ်ယောက်နဲ့တစ်ယောက် အပေး အယူအဆင်ပြေပြေနဲ့ တစ်သက်မှာ တစ်ယောက်တည်းဆိုတဲ့ အိမ်ထောင် အဆင်ပြေတာမျိုး ပဲအားလုံး ကိုဖြစ်စေချင်တယ်။ ခိုင်မြဲ ပျော်ရွှင် တဲ့ မိသားစုတွေပဲ အားလုံးကိုဖြစ် စေချင်တယ်။
