''အခုရောက်လာတဲ့ ရွှေငါး ၂.၅G တစ်စီး ရောင်းလိုက်တာသိန်း ၄၁ဝနဲ့ အလုပ်ဖြစ်သွားတယ်။ အခုရောက်လာတဲ့ ကားအသစ် ၁၀ဝ ကျော်ထဲမှာ အစီး ၈ဝလောက်က ရွှေငါးတွေချည်းပဲ။ အရင်က ဒီမှာရှိတဲ့ ၄ဂ/ စီးရီးတွေကိုရော ဘယ်လောက်စျေးပဲ ရှိတော့မယ်ဆိုတာ စဉ်းစားကြည့်ပါ။ အရင်က သိန်း ၁၂၀၀ နဲ့ဝယ်ရတာကို မပြောနဲ့တော့။
ကျွန်တော်ထင်တယ် အဲဒီကားတွေက သိန်း ၃၀၀ ပတ်လည်မှာပဲ ရှိလိမ့်မယ်။ သုံးဆလောက်တော့ ထိုးကျသွားတယ်။ ဒါ ကောင်းတယ်လို့ ပြောလို့ရတယ်။ ဒါပေမဲ့ လက်ဝယ်ရှိထားတဲ့ သူတွေကိုတော့ နစ်နာစေချင်လို့ မဟုတ်ပါဘူး''ဟု ကားဈေးကွက်တွင် ဝယ်ရောင်းပြုလုပ်သူ ကိုမင်းသီဟက ပြောသည်။ယခင် မိုဒယ်မြင့် ကားများတစ်စီးတွင် မိုဒယ်တစ်ခုအကွာကို သိန်း ၄၀၊ သိန်း ၅၀ ပေါက်ခဲ့သော်လည်း ယခုကားသွင်းခွင့် ရရှိမှုများကြောင့် မိုဒယ် အနိမ့်အမြင့် အကွာ လေးငါးသိန်းသာ ကွာဟမှု ရှိလာကြောင်း သိရသည်။
''အရင်ကရှိတဲ့ ရွှေငါး ၄ဂ/ စီးရီးက ၃၀၀ ပတ်လည်ဆိုရင် ခုရောက်နေတဲ့ ရွှေငါး ၆ဂ/ စီးရီးတွေဆို ၃၅ဝနဲ့ ၄၅ဝမှာ ပေါက်နေတယ်။ အခု ၄ဂ/စီးရီးတွေက ဒီမှာ တစ်နှစ်ခွဲ စီးပြီးသားတွေ။ ဟိုကရောက်လာတဲ့ ၆ဂ/ စီးရီးတွေက အသစ်တွေလေ။ ဒါပဲ ပေးစီးကြတော့မှာပေါ့''ဟု ဟံသာဝတီ ကားဈေးကွက်မှ ဦးမြတ်အောင်က ပြောသည်။
''ကားအသစ်တွေ ရောက်လာရင် ဈေးကွက် လုံးဝ ပြောင်းသွားမယ်။ ကားအသစ်တွေ ရောက်လာတဲ့အတွက် မြန်မာပြည်က ဂရိတ်တစ်ခု ရလာပြီ။ ဈေးတန်းတွေ အနေနဲ့ ၁၀ဝလောက် ဆင်းသွားရင် ၂၀ဝကျော်သုံးမယ်။
သိန်း ၁၀ဝကျော်ဆိုရင်လဲ ကားပြခန်းတွေမှာ လိုက်ကြည့်ပြီး ဝယ်နိုင်တယ်။ ပွဲစားစကားလဲ ယုံစရာမလိုတော့ဘူး။ တကယ်လို့ သူတို့ လုပ်ပေးရင်လဲ ဘော်ဒါကြေးလောက်ပဲ ပေးရတော့မယ်''ဟု ကားဝယ်ရောင်း ကျွမ်းကျင်သူ ကိုအောင်ကျော်က ပြောသည်။
