တရုတ်နိုင်ငံသို့ ငါးပေါင်းမှုန့်ကို တရားဝင် တင်ပို့နိုင်ရန် ဆောင်ရွက်နေကြောင်း ငါးလုပ်ငန်း ဦးစီးဌာနမှ သိရသည်။ယင်းသို့ တရားဝင် တင်ပို့နိုင်ရန်အတွက် တရုတ်နိုင်ငံမှ အင်စပက်တာများ လာရောက်စစ်ဆေးမှုများ ပြုလုပ်နေသည်ဟု သိရသည်။'' Fish Meal တရုတ်နိုင်ငံကို တရားဝင် တင်ပို့ခွင့် ရရှိရေး ဆောင်ရွက်နေပါတယ်။ တရုတ်က အင်စပက်တာတွေက Fish Meal စက်ရုံများကို စစ်ဆေးခဲ့ပါတယ်''ဟု ငါးလုပ်ငန်း ဦးစီးဌာနမှ ညွှန်ကြားရေးမှူးချုပ် ဦးခင်ကိုလေးက ပြောသည်။
တရုတ်အင်စပက်တာများက ရန်ကုန်၊ မြိတ်နှင့် ဘိုကလေးရှိ Fish Meal စက်ရုံ ခြောက်ရုံကို လာရောက် စစ်ဆေးခဲ့ပြီး အကြံပြုချက်များ ပေးခဲ့ကြောင်း သိရသည်။
အကြံပြုချက်များတွင် ကုန်ကြမ်းအရည်အသွေး လတ်ဆတ်ရန်နှင့် သန့်ရှင်းမှု ရှိစေရန် Label တွင် ပြည့်ပြည့်စုံစုံ ဖော်ပြရန် အကြံပြုထားသည်ဟု သိရသည်။
'' Fish Meal ကို တရားဝင် တင်ပို့ခွင့်ရအောင် လုပ်တာ ကောင်းပါတယ်။ ခုချိန်မှာ စက်ရုံ ခြောက်ရုံပဲရှိပါတယ်။ တရားဝင် တင်ပို့ခွင့် ရတဲ့အခါ စက်ရုံတွေ ထပ်မံ ပေါ်ပေါက် လာနိုင်တဲ့အတွက် သယံဇာတ ဆုံးရှုံးနိုင်လို့ စိစစ်ပြီးမှသာ ခွင့်ပြုဖို့ အကြံပြုလိုပါတယ်''ဟု ငါးလုပ်ငန်း အဖွဲ့ချုပ်မှ တာဝန်ရှိသူက ပြောသည်။
Fish Meal တရားဝင် တင်ပို့ခွင့် ရရှိရန် ငါးလုပ်ငန်း ဦးစီးဌာန၊ ရေထွက်ပစ္စည်း ထုတ်လုပ်သူများနှင့် ပို့ကုန် လုပ်ငန်းရှင်များအသင်းနှင့် စက်ရုံပိုင်ရှင်များမှ ပူးပေါင်း ဆောင်ရွက်နေကြောင်း သိရသည်။
