ပရိတ်သတ် သုံးသောင်းဝင်ဆံသည့် နေပြည်တော် ဇဗ္ဗူသီရီဘောလုံးကွင်း၏ ပွဲကြည့်စင်မှာ တည်ဆောက်မှုအပြီးသတ်နေပြီ ဖြစ်ကြောင်း မြန်မာနိုင်ငံဘောလုံးအဖွဲ့ချုပ်မှ သိရသည်။
ထိုသို့ ပွဲကြည့်စင်များ အပြီးသတ်ထားသော်လည်း ကွင်းမြေအနေအထားမှာ ပုံမှန်အတိုင်းသာ ရှိသေးပြီး ပွဲကြည့်စင်၏ အတွင်းပိုင်း များတွင် အကြမ်းထည်များသာ ပြုလုပ်ပြီးစီးလျက်ရှိကြောင်း တွေ့ရှိရသည်။
‘‘ဘောလုံးပွဲကြည့်စင်က သုံးထပ်ပါ။ ဓာတ်လှေကားပါမယ်။ တစ်ခန်းမှာ သုံးဦးနားနိုင်တဲ့ ဘောလုံးသမား နားနေခန်း ၁၈ခန်း ပါဝင်ပါတယ်။ ကွင်းပွဲကြည့်စင်တွေကတော့ လေးဘက်စလုံး အကြမ်းထည်ပြီးစီးနေပါပြီ’’ ဟု မတ်(စ်)မြန်မာကုမ္ပဏီမှ တာဝန်ရှိသူ တစ်ဦးက ပြောသည်။
အဆိုပါဘောလုံးကွင်းရှိ အထပ်သုံးထပ်တွင် မြေညီထပ်၌ အခန်းပေါင်း (၈၅)ခန်း၊ ပထမထပ်၌ အခန်းပေါင်း (၄၄)ခန်း၊ ဒုတိယထပ်၌ အခန်းပေါင်း (၁၆)ခန်း ပါဝင်ကြောင်း၊ ပရိတ်သတ်သုံးသောင်းဆံ့ကွင်းဖြစ်ပြီး အမိုးများ ပတ်လည်တပ်ဆင်သွားမည်ဖြစ်ကြောင်း သိရသည်။
‘‘မိုးတွင်းတုန်းက ကွင်းစီမံကိန်းကို ခဏနားထားခဲ့တယ်လို့ပြောတယ်။ ဘာလို့လဲဆိုတာတော့ မသိဘူး။ ခုမှ ပြန်စတင်တာပါ’’ ဟု အဆိုပါကွင်းမှ အလုပ်သမား တစ်ဦးက ပြောသည်။
ဇဗ္ဗူသီရီဘောလုံးကွင်းကို လာမည့် ၂၀၁၃မြန်မာနိုင်ငံတွင် ကျင်းပမည့် အရှေ့တောင်အာရှဆီးဂိမ်းအမီတွင် အပြီးစီး တည်ဆောက် သွားမည်ဖြစ်ကြောင်း သိရသည်။
